Ish-legjenda e Anglisë dhe Arsenalit, David Seaman, ka kritikuar festimet moderne të portierëve, duke veçuar Gianluigi Donnarumma për ato që ai i konsideron reagime të ekzagjeruara pas pritjeve rutinë.
Duke folur në podcastin Beast Mode On me Adebayo Akinfenëa, ish-portieri i Arsenalit dhe Anglisë u shpreh se nuk është adhurues i festimeve të çdo pritjeje, edhe kur ndërhyrja nuk e justifikon një reagim të tillë.
“Janë ata që festojnë vërtet çdo goditje. Donnarumma, që është një nga të preferuarit e mi për momentin, po bënte festime të mëdha pas disa pritjeve gjysmë të mira”, tha Seaman.
“Kur e bëjnë këtë, unë them: ‘Hajde, je më i mirë se kaq’”, ka shtuar ai, duke shprehur shqetësimin e tij për mënyrën se si portierët modernë reagojnë pas çdo ndërhyrjeje.
Donnarumma nënshkroi me Manchester Cityn gjatë verës, pasi mbeti jashtë planeve të Paris Saint-Germain, me gjigantët e Ligue 1 që transferuan Lucas Chevalier për ta zëvendësuar. Ky transferim ka sjellë shumë vëmendje dhe pritje për performancën e tij në Premier League.
“Kur shoh portierë që sapo kanë firmosur për një klub dhe reagojnë në atë mënyrë pas një pritjeje që nuk është as shumë e mirë, mendoj: ‘Çfarë po bën? Feston kur ka vërtet rëndësi.’ Kjo më bezdis shumë”, shtoi Seaman, duke theksuar se portierët duhet të kenë një qasje më të matur ndaj festimeve.
Seaman foli gjithashtu për evolucionin e rolit të portierit dhe dha mendimin e tij për aktualin David Raya, i cili po luan një rol kyç teksa Arsenali synon suksesin në Ligën Premier. Ai theksoi se, ndonëse portierët modernë janë më të përfshirë në lojë me topin në këmbë, bazat e rolit – pozicionimi, vendimmarrja dhe qetësia, mbeten po aq të rëndësishme.
Me kalimin e kohës, roli i portierëve ka evoluar, dhe ata tani duhet të jenë të aftë të luajnë me topin, të bëjnë pasime të sakta dhe të kontribuojnë në ndërtimin e lojës. Megjithatë, Seaman beson se festimet e ekzagjeruara pas çdo pritjeje mund të dëmtojnë imazhin e portierëve dhe të krijojnë pritshmëri të gabuara për performancën e tyre.
David Seaman, me përvojën e tij të gjatë në futboll, mbetet një zë i rëndësishëm në diskutimet mbi evoluimin e lojës dhe sjelljen e lojtarëve. Kritikat e tij ndaj festimeve të portierëve moderne janë një thirrje për reflektim dhe maturi në një kohë kur futbolli po ndryshon me shpejtësi.
Telegrafi/